12-13 ғасырларда тұрғызылған мұнара Түркістан облысы, Созақ ауданы, Ақсүмбе ауылында орналасқан
Қаратаудың етегіндегі Ақсүмбе ауылының нышаны, киесі саналатын қастерлі мұра «Ақбикеш» мұнарасы құлады, деп хабарлайды Qaz365.kz.
“Қолда бар тарихи ескерткіштен айырылдық. 12-13 ғасырларда тұрғызылған «Ақбикеш» мұнарасы құлады. Дабыл қақтық, ешкім құлақ аспады. Жауын-шашын тимеу үшін төбесін жабу керек дедік. Олай істемеді, төбеден жауған жаңбыр, қар суы дуал-қабырғасына кеулеп кіріп, ескерткішті құлатты. Енді міне, ішіндегі ескерткіш дуалдары да қирады. Түркістан облысы, Созақ ауданы, Ақсүмбе ауылындағы «Ақбикеш» мұнарасына жөндеу жұмыстарын Қазқайтажаңарту РМК РГП Казреставрация мекемесі жасаған «Ақбикеш» мұнарасы тікелей мемлекет қарауында болғандықтан бұл жазбаның Созақ аудандық әкімдігіне түк қатысы жоқ”, – дейді Жылбек Керімбек есімді ұстаз әлеуметтік желіде.
Айта кетейік, Тарихи деректерде Ақбикеш мұнарасын ХІІІ ғасырда Дешті-Қыпшақ тайпасы қарауыл мұнарасы ретінде салынғаны жазылған. Мұнара биік жерде таудың төмен қабатында орналасқан.
