Сюжет Жұпар есімді жас әйелдің тағдырына негізделген
Белгілі қазақстандық режиссер Ардақ Әмірқұлов ("Отырардың күйреуі", "Қош бол, Гүлсары!") «Жел тоқтаған жер» атты жаңа фильмін көрермен назарына ұсынуға дайындалып жатыр, деп хабарлайды Qaz365.kz тілшісі.
Туынды ҚР Мәдениет және спорт министрлігінің тапсырысы бойынша Ұлттық киноны қолдау мемлекеттік орталығының көмегімен түсірілген.
Сюжет Жұпар есімді жас әйелдің тағдырына негізделген. ХХ ғасырдың 30-шы жылдарының басында екі кішкентай баланың анасы жалған айыппен Сібірге жер аударылған күйеуін іздеу үшін жолға шығады. Саяхат барысында Жұпар адамгершілікке жатпайтын қиындықтар мен сынақтардан өтіп, жол бойында Қазақстанның шексіз даласында ашаршылықтан өз өмірлері үшін күресіп жатқан адамдарды кездестіреді.
Фильмнің түсірілім жұмыстары өткен жылдың күзінде Алматы облысы Жамбыл ауданы Мыңбаев ауылында, Қосқұдық теміржол станциясында және Қонаев қаласының маңында өтті.
Басты рөлдерді Жанар Шопанова, Салих Бейсенбай, Мейіржан Мұсақожа және басқалар сомдап шықты. Жобаның сценарий авторлары мен режиссерлері Ардақ Әмірқұлов пен Бағлан Құдайберлиев.
Әмірқұловтың айтуынша, фильм көрермендердің кең ауқымына арналған, өйткені картина баяндайтын трагедия іс жүзінде әрбір қазақтың отбасына тиесілі. Фильм ақ-қара форматта түсірілген.
"Ақ-қара формат сол жылдардағы атмосфераны сезіндіру үшін таңдалды, ол көрермендерді деректі шежіреге бағыттайды", – дейді режиссер.
Қазіргі уақытта фильмді монтаждау жұмыстары жүргізілуде. Картинаны прокатқа шығару осы жылдың күзіне жоспарланған. Сондай-ақ, фильм авторлары халықаралық кинофестивальдерге де қатысу ойда бар дейді.
