Олар «Алматы» қонақүйінің алдында жиналған
Бүгін Алматыда бір топ кинорежиссер наразылыққа шығып, ұлттық киноны қолдау үшін жарияланған байқаудың қорытындысымен келіспейтінін мәлім етті, деп хабарлайды Qaz365.kz.
Олар «Алматы» қонақүйінің алдында жиналған. «Ұлттық киноға – ұлттық менеджер», «Президент Тоқаев! Кино орталығының былықтарына назар аударыңыз!» деген плакаттар ұстап алған.
Митингке шыққандар арасында белгілі өнертанушы Ерлан Төлеутай да бар.
«Мемлекет белгілі бір деңгейде қаржыландырып жатыр. Бірақ қаржыландыру жүйесінде әділетсіздік бар. Ұлттық киноның басшылығына күмәнді адамдар отырып алған. Кешегі Назарбаев жүйесіне қызмет еткендер бар. Олар ұялмай қызармай киноны басқарып отыр. Бұл «Ескі Қазақстан» мен «Жаңа Қазақстанның» күресі», - дейді Ерлан Төлеутай.
Митингке шығушылардың талабы мынандай:
1. 2023 жылдың 22 мамыры мен 25 мамыры аралығында, өрескел заңбұзушылықпен өткелі отырған Питчинг тоқтатылсын!
2. Құрамында Мәдениет және спорт министрлігінің өкілі мен депутат және тәуелсіз заңгер бар арнайы комиссия құрылып, наразы топтың өкілдерінен бірнеше адам бақылаушы болып бекітілсін!
3. Арнайы комиссия мен бақылаушылар іріктеуден өткен 130 жоба мен іріктеуден өтпеген 153 жобаның құжаттарын тексерсін!
4. Егер қандай да бір заңбұзушылық анықталса, шешім шығарған Ұлттық Киноны қолдау мемлекеттік орталығының басшылары мен жауапты қызметкерлері заң аясында жауапқа тартылсын!.
