Үшінші тоқсан 10 оқу аптасынан тұрады
Желтоқсанның аяғында оқушылар қысқы каникулға шығады. Балалардың демалысы он күнге созылады, деп хабарлайды Qaz365.kz.
Оқу-ағарту министрлігінің ақпараты бойынша, екінші тоқсанда оқушылар сегіз апта оқиды. Қысқы каникул 2024 жылғы 30 желтоқсанда басталып, 2025 жылғы 8 қаңтарда аяқталады. Яғни балалар 10 күн демалып, 9 қаңтарда қайтадан мектепке оралады.
Сондай-ақ 1-ші сыныптарға үшінші тоқсанда 7 күнге созылатын қосымша демалыс беріледі. Бастауыш сынып оқушылары 10 ақпан мен 16 ақпан аралығында демалып, 17 ақпанда сабағын жалғастырады.
Үшінші тоқсан 10 оқу аптасынан тұрады. Көктемгі каникул 21 наурыздан 31 наурызға дейін созылады.
Төртінші тоқсанның ұзақтығы 8 оқу аптасын құрайды. Жылдағы дәстүр бойынша еліміздің барлық мектебінде 25 мамыр күні соңғы қоңырау соғылады.
