Бүгінгі таңда құрылыс жұмыстары басталып та кетті
Кешен жаңаөзендік балаларға заманға сай білім беруге арналған, деп хабарлайды Qaz365.kz “ҚазМұнайГаз” компаниясының баспасөз қызметіне сілтеме жасап.
Қандай кешен?
Bolashaq Sarayi жаңаөзендік жасөспірімдердің жан-жақты дамуын қамтамасыз ететін орталық болады. Ауданы 3000 шаршы метрлік кешен балаларға білім алуға және шығармашылықпен айналысу үшін заманауи мүмкіндіктер ұсынады. Жаңа Оқушылар сарайына күніне 350-ден астам бала бара алады.
Бүгінгі таңда қазаншұңқырды дайындау бойынша жұмыстар аяқталды, нысанның архитектуралық тұжырымдамасы мен бас жоспары бекітілді. Сонымен бірге құрылыс бригадалары жұмылдырылып, қажетті материалдар алынды. Құрылыс жұмыстарының аяқталуы және нысанды пайдалануға беру 2025 жылдың соңына жоспарланған. Жалпы, “ҚазМұнайГаз” кәсіпорындары орналасқан өңірлерде әлеуметтік жобаларды тұрақты негізде іске асыруда.
Басқа да жобалар
Жалпы, “ҚазМұнайГаз” Жаңаөзен қаласында жаңа газ өңдеу зауытын салып жатыр. Зауытты жобалау бойынша жұмыстар жүргізілуде. Мердігер тартылған. Құрылыс-монтаждау жұмыстарын бастау 2025 жылға жоспарланған.
Одан бөлек, Жаңаөзенде мұнай-газ өндіруге қажетті тауарлар өндіретін зауыт салынады. Бұл «ҚазМұнайГаздың» Жаңаөзенде мұнай-газ жабдықтары өндірісін қалыптастыру үшін инвесторлар тарту бағдарламасының арқасында мүмкін болып отыр.
