Оқу-ағарту министрлігі 2024 жылды қорытындылады
ҚР Оқу-ағарту министрлігі 2024 жылды бірнеше жетістіктермен қорытындылап отыр,деп хабарлайды Qaz365.kz.
Бұл туралы министрліктің баспасөз қызметі осы жылы атқарылған жұмыстардың қорытындысын жариялады.
Мектеп инфрақұрылымын жаңарту оқу процесіне оң әсерін тигізген
Елімізде 375 мың оқушы орнына арналған 254 мектептің құрылысы аяқталды. Оның ішінде білім беру инфрақұрылымын қолдау қоры есебінен 23 нысан бар. Республикалық және жергілікті бюджет қаражаты, сондай-ақ инвестициялар тарту есебінен – 126 мектеп салынған.
Бұрын-соңды болмаған мектеп салу шаралары үш ауысыммен байланысты проблемаларды айтарлықтай қысқартты. Бүгінде елімізде 3 мыңға жуық мектеп бір ауысымда жұмыс істейді. Сонымен қатар 254 орта оқу орны күрделі жөндеуден өтті, 967 мектеп үшін 1621 заманауи пәндік кабинет (робототехника, химия, биология, физика, STEM) сатып алынды. 1 мың ауылдық мектеп жаңғыртылды. 10 мыңнан астам білім беру ұйымдарының қауіпсіздік жүйелерімен техникалық жарақтандырылуы арттырылған.
Мемлекет басшысының тапсырмасы бойынша білім беруді цифрландыру процесін жеделдету бойынша кешенді жұмыс жүргізілді. 2024 жылдың қорытындысы бойынша интернет жылдамдығы мектептердің 19%-дан 90%-ға дейін ұлғайды. Қазақстандық мектептерде сапалы интернет көрсеткіші 3 есеге артты. Бұл ретте мектеп оқулықтарының 100%-ы цифрлық форматқа ауыстырылды және 11 платформа іске қосылған.
Сондай-ақ, Астана, Маңғыстау, Ақмола және Батыс Қазақстан облыстарының 215 мектебінде тиісті санаттағы балаларды тегін тамақтандыруға арналған «Әлеуметтік әмиян» пилоттық жобасы іске асырылып жатыр екен. Жоба сәтті орындалса, еліміздің барлық өңірінде бұл жоба іске асырылатын болады.
