Жүк көліктерінің маршрут бойынша жүру мүмкіндігі шектеліп тұр
Батыс Қазақстан облысында Ресеймен шекарада 500-ге жуық жүк көлігі тоқтап тұр, деп хабарлайды Qaz365.kz. Бұл жөнінде Қаржы министрлігі Мемлекеттік кірістер комитетінің баспасөз қызметі мәлімдеме жасады.
“2024 жылдың 12 желтоқсанынан бастап Батыс Қазақстан облысы мен Ресей Федерациясының Самара облысының аумағында ауа-райының нашарлауы салдарынан қалың қар, боран, көктайғақ пайда болған. Салдарынан "Сырым" автомобиль өткізу пунктінде Ресей Федерациясына қарай 450-500-ге жуық жүк көлігінің жиналуы байқалады. Ресей Федерациясындағы федералды трассалар бойынша қозғалыс уақытша шектелген және Ресей ТЖМ ақпараты бойынша шектеулер 2024 жылдың 13 желтоқсанында сағат 22.00-ге дейін қолданылады", – делінген Мемлекеттік кірістер комитетінің хабарламасында.
Осыған байланысты жүк көліктерінің маршрут бойынша жүру мүмкіндігі шектеліп, ауа-райының жақсаруын күтуде.
