Ол ұсақ бұзақылық қылмыс жасағаны үшін әкімшілік жауапкершілікке тартылған
Петропавлдағы Абай мен Пушкин ескерткіш мүсінінің төбесіне шыққан құқық бұзушылардың бірі бес тәулік қамауға алынды, деп хабарлайды Qaz365.kz.
Бұл туралы Солтүстік Қазақстан облыстық соты мәлімдеді.
“1 қаңтарда мұз қалашығында жүрген шетел азаматтары Абай мен Пушкин ескерткішіне шығып, ұсақ бұзақылық іс-әрекет жасаған. Ашуланған қала тұрғындары олар туралы полиция қызметкерлеріне жүгінген. Көп ұзамай бұзақылық жасаған шетел азаматтары ұсталды. Бүгін Петропавлдың әкімшілік құқық бұзушылықтар жөніндегі мамандандырылған соты бұзақылық жасаған бір шетел азаматына сот үкімін шығарды. Ол Абай мен Пушкин ескерткішімен қатар Петропавлдағы жаңа жыл символы "жылан" мұз мүсініне де көтерілген. Ескерткіштермен суретке түсуге әуесқойға бес тәулік әкімшілік қамауға алу туралы сот үкімі шықты”, – делінген сот хабарламасында.
Ал қамауға алынған шетел азаматының тағы екі досының Қазақстанда болу мерзімі аяқталған. Бұл үшін оларға да әкімшілік жаза тағайындалуы мүмкін екендігі хабарланып отыр.
