Дрондардың қай елге тиесілі екені тексеріліп жатыр
Қазақстанның батыс аумағына құлаған ұшқышсыз ұшу аппараттарына (дрон) қатысты арнайы тексеріс жүргізіліп жатыр. Бұл туралы 8 сәуірде Қорғаныс министрінің орынбасары Асқар Мұстабеков мәлімдеді, деп хабарлайды Qaz365.kz.
Оның айтуынша, қазіргі уақытта құрылған үкіметаралық комиссия дрондардың қай елге тиесілі екенін және олардың нақты қай бағыттан келгенін анықтаумен айналысуда.
Вице-министр Қазақстанның әуе шабуылына қарсы қорғаныс жүйесі штаттық режимде жұмыс істеп тұрғанын жеткізді. Мұстабеков елде радиоэлектрондық құрылғылар мен қорғаныс құралдарының жеткілікті екенін, сонымен қатар дрондардан қорғайтын жаңа технологиялар сатып алынып жатқанын атап өтті. Алайда, министрлік өкілі ел аумағына екі дрон құлағанын айтса, бейресми деректер мен БАҚ мәліметтерінде төрт дрон туралы сөз қозғалып отыр.
Дрондардың құлау фактілері 2025 жылдан бері тіркеле бастаған. Мәселен, өткен жылдың ақпанында БҚО Бөкей ордасы ауданынан табылған дронды сарапшылар ресейлік «Орлан-10» аппаратына ұқсатқан болатын. Кейіннен наурыз айында Тасқала және Жәнібек аудандарынан, сондай-ақ маусымда Маңғыстау облысындағы «Болашақ» станциясы маңынан белгісіз ұшу аппараттары табылған еді.
