Облыстық Еңбек басқармасы оқиғаны растады
Павлодар облысындағы «Богатырь Көмір» көмір бөлімінде қаза тапқан қызметкер ауыр жүк көлігінің жүргізушісі болып жұмыс істеген. Бұл туралы блогер әлеуметтік желідегі парақшасында жазды, деп хабарлайды Qaz365.kz.
«2 шілдеде «Богатырь» бөлімінде апат орын алып, ауыр жүк көлігінің жүргізушісі қаза тапты. Алдын ала себеп — тежегіштердің істен шығуы. Бұл «БелАЗ» моделі үшін жиі тіркелетін жағдай. Туыстары мен жақындарына көңіл айтамын», - деп жазды блогер.
Облыстық Еңбек басқармасы оқиғаны растады.
«2 шілдеде «Богатырь Көмір» серіктестігінде жұмыс істеген БелАЗ-132 көлігінің жүргізушісі қайтыс болды. Көлік жүк түсіру орнынан қозғалып бара жатып, шетіне құлап кетті. Жүргізуші жансақтау бөліміне жеткізілгенімен, оны аман алып қалу мүмкін болмады», - деп хабарлады ведомство.
Еңбек департаменті оқиғаға қатысты тергеуді бастады.
