Әбілқайыр Оңғар басқармаға биылғы жылдың сәуір айында тағайындалған
Шымкент Абай аудандық жайлы ортаны дамыту басқармасының басшысы Әбілқайыр Оңғар әлеуметтік желіде «Екі аяқты малдар арамызда жүр» деген жазба қалдырған, деп хабарлайды Qaz365.kz.
Бұл туралы Түркістан облысының танымал журналисі Абай Балажан жазды. Жас шенеунік «Таза Қазақстан» акциясы жүріп жатқан уақытта тазалық сақтамаған халықты кінәлаған.
«Екі аяқты малдар арамызда жүр! Қоқыс тастаған адамға мал деп айтсаң тағы ренжиді», – деп жазған шенеунік.
Әбілқайыр Оңғар басқармаға биылғы жылдың сәуір айында тағайындалған.
«Жазбаның иесі кешегі оқымаған қазақ емес. Оқыған қазақ. Құр оқыған қазақ емес, әйдік шенеунік! Шымкент қалалық жайлы ортаны дамыту басқармасының басшысы көрінеді. 1994 жылы дүниеге келген. Иә, қоқыс тастаған адамды ақтап алғалы отырған жоқпыз. Қоқысты көшеге білмей тастаса да, біліп тастаса да ол - қоғам үшін зиянкес адам. Бірақ, оларды мал деп сөгу қалай болады? Қоқыс тастайтын адам да, қоқыс тастамайтын адам да халықтың құрамына кіреді, қалың бұқара өкілі болып саналады. Ал, сен биліктің өкілісің, Әбілқайыр бала! Сонда билікте отырып, өз халқыңды мал дейсің бе? Ызадан жарылып өліп бара жатсаң надан десең де жетер еді ғой», – дейді журналист Абай Балажан.
