Жүрек пен өкпе трансплантациясы тек адам қайтыс болғаннан кейін жасалады
Қазақстандықтардың тірі кезінде көбіне қай ағзасын донор ретінде беретіні белгілі болды, деп хабарлайды Qaz365.kz тілшісі Massaget.kz сайтына сілтеме жасап.
"Транспланттауды және жоғары технологиялық медициналық қызметті үйлестіру жөніндегі республикалық орталық" ШЖҚ РМК ақпаратына сәйкес, кейінгі бес жылда, яғни 2018-2022 жылдар аралығында ең көп бүйрек берілген: қайтыс болғаннан кейінгі донордан - 44, тірі кезіндегі донордан - 637 бүйректі трансплантаттау жүргізілген.
Сонымен қатар, қайтыс болғаннан кейінгі донордан - 16, тірі кезіндегі донордан - 172 бауырды трансплантаттау бойынша операциялар жүргізілді.
Жүрек пен өкпе трансплантациясы тек адам қайтыс болғаннан кейін жасалады. Кейінгі бес жылда 25 жүрек трансплантациясы және 9 өкпе трансплантациясы жасалған.
Осы деректерге сүйене отырып, осы кезеңде қайтыс болғаннан кейінгі донорлардан 94 ағза трансплантациясы және тірі кезіндегі донорлардан 809 ағза трансплантациясы жүргізілген.
