Маңғыстау облысының Түпқараған ауданында Каспий итбалықтарының жаппай қырылу дерегі тіркелді. Бұл туралы облыстық экология департаментінің баспасөз қызметі мәлімдеді, деп хабарлайды Qaz365.kz.
Ведомство мәліметінше, экология департаменті мен облыстық балық инспекциясы бірлесіп жүргізген мониторинг кезінде Асан елді мекенінен бастап Баутино мүйісіне дейінгі жағалау сызығында 112 өлі итбалық табылған.
«Мониторинг барысында Асан елді мекенінен Форт-Шевченко жағажайына дейінгі аралықта 39 итбалықтың, ал жағажайдан Баутино мүйісіне дейінгі аумақта тағы 73 итбалықтың өлі денесі анықталды», – делінген ресми хабарламада.
3 қараша күні тұрғындардан Каспий теңізінің Баутино маңындағы жағалауында өлі итбалықтар табылғаны туралы ақпарат түскеннен кейін, экология департаментінің зертханалық-талдамалық бақылау бөлімінің мамандары теңіз суынан сынама алған.
Қазір зертханалық тексерулер жүргізіліп жатыр. Итбалықтардың өліміне нақты не себеп болғаны әзірге белгісіз.
