Ал халық одан хабарсыз
Қазақстанда банктік және интернет-алаяқтықтың өсуі байқалады. Құқық қорғау органдарының қарсылығына қарамастан, мұндай қылмыстардың саны өткен жылмен салыстырғанда 26%-ға өсті, деп хабарлайды Qaz365.kz.
Бас прокуратураның Құқықтық статистика және арнайы есепке алу Комитетінің мәліметтері бойынша, 2025 жылдың тоғыз айында интернет-алаяқтыққа байланысты 20 мыңнан астам қылмыстық іс тіркелген. Ең көп таралған түрі - бөтен адамдардың атына алаяқтық несие беру.
Сәуле Төкебаева банктердің заңсыз әрекеттері туралы айтып берді. Оның сөзінше, банктер азаматтардың атынан электрондық-цифрлық қолтаңба жасайды және олардың қатысуынсыз шарттарға қол қояды. Төкебаева өзінің осындай схеманың құрбаны болғанын айтып, кінәлілерді жауапқа тартуды талап етіп отыр.
Мәжіліс депутаты Мұрат Әбенов бір аптаның ішінде өзіне 40-тан астам адамның осындай шағымдар бойынша жүгінгенін атап өтті. Ол көп жағдайда банктердің азаматтардың құқықтарын бұзатынын, биометрияны тексермей, антифрод жүйесін қолданбай, клиенттің қатысуынсыз несие рәсімдейтінін айтып өтті.
«Біз алаяқтардың құжаттары түгел болмаса да, миллиондаған несие алып, оларды жеке шоттарға аударып жатқанын көреміз. Бұл өте сұмдық жағдайлар. Сондықтан банктердің жауапкершілігін күшейту үшін жаңа түзетулер енгізуге мәжбүрміз», – деді депутат.
Оның айтуынша, әріптесі Бақытжан Базарбекпен екеуі азаматтардың құқықтарын қорғауға және қаржы ұйымдарына бақылауды күшейтуге бағытталған 28 баптан тұратын түзетулер пакетін дайындаған.
