Мен өзімнің кінәсіздігімді дәлелдегенше соңына дейін барамын
Бүгін, 14 қарашада №-2 Атырау қалалық сотында Атырау облысы әкімінің бұрынғы орынбасары Бақытгүл Хаменованың сот процесс бойынша сотталушылардың соңғы сөздері тыңдалды, деп хабарлайды qaz365.kz тілшісі AtyrauPress-ке сілтеме жасап.
Бірінші болып пара берді деп күдіктенген "Балқыту" ЖШС басшысы Адамов сөз сөйледі. Ол соттан айыппұл немесе елді мекендегі жазасын өтеу түріндегі жазасын жеңілдетуді сұрады. Сотталушы мүгедек ұлдары мен саңырау және мылқау келіндері бар екенін айтып, соттан зейнеткерлік жасын ескеруді сұрады.
Одан кейін Хаменова үкім алдында соңғы сөзін сөйледі.
"Сотталушылар Рысқалиев пен Адамов істе кінәларын мойындап, кінәсіз екенін дауламады. Болған істі егжей-тегжейлі айтып бермей, жасаған қылмысы туралы ақталмады. Тіпті жеңілдетуге тырыспады. Біз олардың қылмыс туралы әңгімесін “шын пейілмен” айтып берді десек болады. Олар өздері туралы және жасаған қылмыстарын мойындады, сондықтан менің бұл іске қатыстылығым жоқ. Мемлекеттік айыптаушы мұны ескеріп отырған жоқ. Немесе өзінің қылмыстық істе олқылықтарын мойындағысы келмейді. Керісінше шешуші категориямен, істің толық материалдарын есепке алмай, жазалау туралы шешім шығаруды айтып отыр. Мен соттың, сондай-ақ Рысқалиев пен Адамовтың айғақтары бойынша жеке қаулы шығаратынына және нәтижесінде осы "қылмыстық істі" ойдан шығарғандарға қатысты қылмыстық іс қозғалатынына сенгім келеді. Мені ақтауды сұраймын. Менде қажетті дәлелдің бәрі бар. Мен қылмыскер емеспін және өз кінәсіздігімді дәлелдеу үшін соңына дейін барамын, – деді Бақытгүл Хаменова.
Естеріңізге сала кетейік, алдыңғы отырыста мемлекеттік айыптаушы Лаура Асанова Бақытгүл Хаменоваға мүлкін тәркілеп, жеті жылға бас бостандығынан айыруды сұраған болатын. Айыптаушы тарап облыстық мәдениет басқармасының бұрынғы басшысы Ақылбек Рысқалиевті де жазалауды сұрайды. Ал пара алды деп күдіктенген жеке компанияның басшысы үшін прокурор төрт жыл колонияға бас бостандығынан айыруды сұрады. Атырау облысы әкімінің бұрынғы орынбасары Бақытгүл Хаменоваға, Атырау облысы мәдениет, тілдерді дамыту және мұрағат істерін жүргізу басқармасының бұрынғы басшысы Ақылбек Рысқалиевке және "Балқыту" ЖШС директоры Өлтай Адамовқа қатысты сот процесі 2022 жылғы 11 тамызда басталды. Іс үш ай бойы жалғасып жатыр. Бүгін сот ақырғы шешімді шығару үшін кеңесу бөлмесіне шықты. Ертең, 15 қарашада сағат 10.00-де іс бойынша үкім шығарылады.
