Қазақстанның Премьер-министрі Олжас Бектенов Kazakh Tourism ұлттық компаниясының басқарма төрағасы Талғат Ғазизовтен нақты нәтиже күтетінін мәлімдеді. Бұл Үкімет отырысында айтылды, деп хабарлайды Qaz365.kz.
Жиында Ғазизов Қазақстанның туристік әлеуетін шетелде ілгерілетуге қатысты атқарылған жұмыстар туралы есеп берді. Ол осы қызметке 16 қаңтарда тағайындалған болатын. Премьер-министр оның бұл қызметке жақында келгенін атап өтіп, тиімділікке қойылатын талаптың жоғары екенін ескертті.
«Сіз жаңа тағайындалдыңыз, бірақ бұл жеңілдік емес. Біз нақты нәтиже күтеміз. Нәтиже болса – жұмыс жалғасады, болмаса – қоштасамыз. Келістік пе?» – деді Олжас Бектенов.
Үкімет басшысы туризм саласында өңірлерде белгілі бір оң өзгерістер барын мойындағанымен, тексерулер әлі де шешілмеген жүйелі мәселелердің көп екенін көрсеткенін айтты. Оның сөзінше, бірқатар туристік нысандар сапалы интернетпен қамтамасыз етілмеген, ал бұл бағыттағы жұмыстар тым баяу жүріп жатыр.
Сонымен қатар санитарлық талаптардың сақталмауы, қажетті рұқсат құжаттарының алынбауы, көлік инфрақұрылымының әлсіздігі, қоқыс мәселесі, энергиямен қамтудағы олқылықтар, тәулік бойы жедел қызметтердің болмауы және қонақүй бағасының қымбаттығы да сынға алынды.
Аталған проблемаларды жүйелі түрде шешу үшін Премьер-министр барлық өңір әкімдіктерін, «Атамекен» ұлттық палатасын, туризм саласындағы ірі кәсіпкерлер мен сарапшыларды қамтитын жедел үйлестіру кеңесін құруды тапсырды. Кеңеске Премьер-министрдің орынбасары – Мәдениет және ақпарат министрі Аида Балаева жетекшілік ететін болды.
