Бұл туралы СІМ өкілі айтты
Қазақстан Ауғанстанның жаңа әкімшілігі дипломаттарын аккредиттейтін болды, деп хабарлайды Qaz365.kz.
Бұл туралы БАҚ өкілдерінің қатысуымен өткен брифингіде ҚР Сыртқы істер министрлігінің ресми өкілі Айбек Смадияров айтты.
“Ауғанстанның жаңа әкімшілігі бізге дипломаттарды аккредиттеу туралы өтініш жолдады. Біз оларды тіркеу жөнінде шешім қабылдадық. Айта кетейін, 2021 жылдың тамызында бұрынғы режим құлаған соң елде «билік вакуумы» пайда болды. Ауғанстан Ислам Республикасының шетелдегі елшіліктері бұл мемлекеттің атынан өкілдік етуін тоқтатты”, - дейді ресми өкіл.
Ол Ауғанстан мәселесі әлі де халықаралық қауымдастықтың қызу талқылауында болатынын атап өтті. Кеше Самарқан қаласында Ауғанстанмен көршілес елдердің кезекті кездесуі болған.
“Біз Ауғанстанның біртұтас болғанын әрі көркейгенін қолдаймыз. Ауғанстанның жаңа әкімшілігі өкілдерінің бізге келуі – мойындау дегенді білдірмейді. Бұл мәселе БҰҰ-ның құзырында қалады”, - деп атап өтті Айбек Смадияров.
Сонымен қатар ол осындай миссиялар Өзбекстан, Қырғызстан, Түрікменстан, Ресей, Қытай, Қатар, Біріккен Араб Әмірліктері және Пәкістанда бар екенін еске салды.
Еске салып өтсек, 2021 жылы Ауғанстанның билігіне келген «Талибан» Қазақстанда тыйым салынған ұйымдар қатарына жатқызылған.
