Прокуратура барлық азаматтарды мұқият болуға шақырды
Прокурорлар Астананың үлескерлеріне ескерту жасап, қандай жағдайда үлестік құрылысқа инвестиция салуға болатынын еске салды, деп хабарлайды Qaz365.kz тілшісі елорда прокуратурасының сайтына сілтеме жасап.
"Прокуратура азаматтарға заңды айналып өту үшін алдын ала шарт, ниет шарты, инвестиция, брондау және осы сияқты жасырын шарттар жасасатын жосықсыз құрылыс компанияларынан абай болу керектігін ескертеді. Елдің қаражатын тарту үшін құрылыс салушылар тұрғын үй құрылысына үлестік қатысу жөнінде шарт жасасуға міндетті", - дейді қалалық прокуратура.
Қадағалау органының мәліметінше, соңғы 6 жылда үлескерлердің мүддесі үшін 104 миллиард теңгеге 143 талап арыз жазылған. Нәтижесінде 15 қылмыстық іс қозғалып, 45 адам сотталып, 147 адам әкімшілік жауапқа тартылған.
Тек екі жағдайда ғана құрылыс салушы үлескерлердің ақшасын үлестік қатысу туралы шартсыз тарта алады:
- қазақстандық тұрғын үй компаниясымен шарт болса;
- құрылыс салушыда әкімдіктің рұқсаты болған жағдайда.
"Барлық азаматтарды мұқият болуға және өз ақшаларымен тәуекел етпеуге шақырамыз", - деп ескертті прокуратурада.
