Жантүршігерлік оқиға 12 сәуірде болған еді
Алматының Түрксіб ауданындағы базардан басы табылған әйел жаман аурумен ауырған. Бұл туралы марқұм уақытша паналаған әлеуметтік бейімдеу орталығының қызметкері «Шешімі бар» бағдарламасында мәлімдеді, деп хабарлайды Qaz365.kz тілшісі Almaty.tv телеарнасына сілтеме жасап..
Елдің есін екеу, түсін төртеу қылған қылмыс 12 сәуірде болған еді. Марқұмды танитын Түрксіб ауданындағы дүкеннің сатушысы әйелдің бассыз денесін Шолохов көшесіндегі саябақтан ит тапқанын айтады.
«Тергеушілердің айтуынша, оқиға таңғы сағат 5:00-де болған. Сағат 9:00 шамасында денесі табылған. Бір әйел серуендеп жүргенде, денесін ит тауып алған», – деді сатушы Айжан.
Дене табылған жерде әлі де ұйыған қанның қалдығы бар. Ал саудагерлер бас салынған пакетте қан болмағанын айтады.
БЛИЦ:
– Оны басында біз бомба деп ойладық. Одан кейін ашып қарадық. Басты көріп, адам екенін түсіндік. Басының терісі көрініп тұрды. Қаны жоқ, тап-таза болды. Жуып, тазалап қойған сияқты
– Киімінің бәрі жабық болды. Көзілдірік, медициналық бетперде, басында панама, шашы, түрі көрінбейді. Бірнеше секундқа кіріп, мына жерде тұрды. Қолынан бір нәрсе түсіп қалғандай кейіп танытты. Сол еңкейген күйі жылдам кетіп қалды.
Бұл жайтқа қатысты телеарнаның «Шешімі бар» бағдарламасында пікірін білдірген заңгердің айтуынша, қанды қылмысты қаскөй алдын ала жоспарлауы мүмкін.
«Ол іс-әрекетіне жауап беретін адам. Өйткені, түрін көрсетпеді, еңкейіп тұрды. Бас кимін төмен түсіріп алған. Ол басты жууы керек апарып. Ол үшін су ағатын жерге не үйге апару керек дегендей. Соның бәріне қаншама уақыт қажет. Басты кесу, жуу, тазалау, пакетке салу – бәрін ойластырған», – деді заңгер Нұрлан Байғазин.
Айта кетейік, 47 жастағы марқұмның аты-жөні А. Тұрғылықты жері жоқ, бұрын есірткі қылмысы үшін бірнеше рет сотталған екен. 27 жастағы бір қызы бар. Оксананы бірнеше ай бойы танитын саудагерлер оның күйеуінің де түрмеде отырғанын, өзі үйсіз, дала кезіп жүретінін айтады. Соңғы кездері саябақ ішіндегі ескі сахнаны паналапты.
«Бір сау жері жоқ. Сол жердегі күзетші баланың айтуынша, пышақтап тастаған», – деді дүкен сатушысы Айжан.
Марқұм өлерінен шамамен 4 ай бұрын әлеуметтік бейімдеу орталығын паналаған. Ол жаққа әйелді масаң күйде Түрксіб аудандық патрульдік полициясы жеткізген. Бұл мекемеде 3 ай тұрып, қайта шығып кетіпті.
Айта кетейік, кеше Алматы қалалық полиция департаменті күдіктінің ұсталғанын мәлімдеді. Қаскөй 60 жаста және марқұммен таныс болған. Қылмыс жанжал кезінде жасалыпты. Өзге ақпарат жария етілмеді. Іс әлі тергеліп жатыр.
«Оқиға мектеп-интернат пен саябақты бөліп тұрған қоршаудың артында болған», - дейді ата-аналар.
Енді бұл жағдайдан кейін балаларын сабаққа жіберуге де қорқып қалған.
