Соңғы кездері басынан дау арылмаған Мәжіліс депутаты Жигули Дайрабаев кеше өзіңе қарсы ақпараттық соғыс жүріп жатқанын айтқан. Бірақ бүгін тілшілерге оның атын атамай қойды, деп хабарлайды Qaz365.kz.
Кеше Жамбыл облысының 60 жастағы тұрғыны Василий Ковешников Алматыдағы баспасөз мәслихатында Мәжіліс депутаты Жигули Дайрабаевтың ұлдары «құлдықта адам ұстағанын» айтқан. Кейін бұған жауап берген депутат өзіңе қарсы ақпараттық соғыс жүріп жатқанын жеткізген.
«Ол іс бойынша адвокат бар. Сол айналысып жатыр. Сіздер айып етпеңіздер. Бәріңізді жақсы көремін», – деп депутат Мәжілістегі жиынға кіріп кетті.
Жигули Дайрабаев мәжілісмендердің арасында жалғыз онда ғана жау бар екеніне жауап бере алмады.
Ал “Мандатыңызды тапсырмайсыз ба?” деген сауалға: «Сіз кімге дауыс бердіңіз? Маған ондай сұрақ қоймаңыздар, ұят болады», деп айтты.
Айта кетейік, бұған дейін депутат Жигули Дайрабаевтың екі ұлы, атап айтқанда Марат Дайрабаев және Дидар Молдақалықтардың субсидиялау қағидаларын бұзып, сатып алынған «Альбион» құлпынай көшеттерін жеке мақсаттарына пайдаланғаны анықталған болатын.
Сот шешімімен Дайрабаевтың екі ұлының мүлкі тәркіленіп, басшылық лауазымды қызмет атқару құқығынан айырылған. Сонымен қатар 5 жылға шартты түрде сотталды.
