Бүгін Райымқұлова алғаш рет сотқа офлайн қатысты
Бүгін бұрынғы мәдениет және спорт министрі Арыстанбек Мұхамедиұлының сотында дәл сол министрлікті басқарған Ақтоты Райымқұлова куәгер ретінде жауап беріп жатыр. Бүгін Райымқұлова алғаш рет сотқа офлайн қатысты, деп хабарлайды Qaz365.kz.
«Мұхамедиұлының бюджет қаражатын жымқырғаны жөнінде сізде дәлел бар ма?» деп сұрақ қойды Мұхамедиұлының адвокаты Мұстақым Төлеев Ақтоты Райымқұловаға.
Ақтоты Райымқұлова бұл сұрақтың өзіне қойылуы "дұрыс емес" екенін атап өтті. Оның сөзінше, ондай мәлімет жоқ.
«Менде ондай мәлімет жоқ. Ол мәліметтерді анықтау басқа инстанциялардың міндеті. Бірақ қандай да бір жоспарлар мен іс-шаралардың жүзеге асырылуына заңды тұлға басшылығы жауапты. Ал қалғанын сот шешеді», – деді Райымқұлова.
Бұдан бұрынғы сот отырысында Райымқұлова Үндістанда көрмені өткізуге рұқсат бермегенін мәлімдеп, жағдайдың қалай болғанын егжей-тегжейлі айтып берген. Еске салайық, 2022 жылдың 28 мамырында сот санкциясымен Ұлттық музей директоры болған Арыстанбек Мұхамедиұлы қамауға алынған. Тергеу «Алтын адамның әлем мұражайлары бойынша шеруі» халықаралық көрмесін өткізуге, сондай-ақ «Қазақстанның ұлттық киелі нысандары мен музей қорларын жалпымемлекеттік фотограмметриялық 3D-сканерлеу» және «Қазақстан Республикасының Ұлттық цифрлық киноколлекциясын цифрландыру» жобаларына бөлінген бюджет қаражатын ұрлау фактілері бойынша жүргізілді. Іс бойынша төрт айыпталушы бар: Арыстанбек Мұхамедиұлы (Ұлтық музей директоры), Ұлттық музейдің экс-директоры Алмас Нұразхан, “Экспонат” ЖШС директорының орынбасары Азамат Көшенов, “Экспонат” ЖШС бас бухгалтері Айым Сәдуақасова.
