Оның айтуынша, туысы болсын-болмасын, заңсыз алынған жерлер қайтарылады
Қызылорда облысы әкімі Нұрлыбек Нәлібаев орталық коммуникациялар қызметінде өткен брифингіде туыстарының иелігіндегі жер телімдері туралы пікір білдірді, деп хабарлайды Qaz365.kz.
Брифингте журналист өңір әкімінен туыстарының атында ауыл шаруашылығы мақсатында қанша гектар жер бар екенін сұрады.
«Жергілікті халықтың айтуынша, Қызылорда облысында сіздің туыстарыңыздың меншігінде көп жер бар көрінеді. Ол туралы не айтасыз?», – деп сұрады тілшілердің бірі.
Ол мұнымен келіспейтінін, ал нақты жауапты жазбаша беретінін немесе құқық қорғау органдарынан да сұрауға болатынын айтты.
«Олар тексеріп сізге ақпаратын береді. Мен сіздің бұл сұрағыңызбен келіспеймін. Алса, заң жүзінде өзіне тиесілі жері. Кезінде берілген, біз әкім болмай тұрып, осыдан 20 жыл бұрын берілген жерлерін алған шығар. Ал басқа ондай иеленіп жатқан жерлері жоқ. Сізге біз міндетті түрде жауап береміз», – деді Нұрлыбек Нәлібаев.
Сондай-ақ әкім өңірде пайдаланылмай жатқан жер телімдерін қайтару жұмысы қарқынды жүріп жатқанын атап өтті.
«Былтыр облыста 157 гектар жер мемлекет меншігіне қайтарылған. Ал биыл 200 га астам жерді мемлекетке қайтару жоспарланып отыр. Біздің туыс бола ма, басқа бола ма, жерді заңсыз алса қайтарады. Оны менен басқа да органдар қадағалап отыр. Ел айтты екен деп сұраудың қажеті жоқ, нақты дәлелмен сөйлеген дұрыс деп есептеймін», – деді ол.
