3 науқастан АИТВ инфекциясы анықталған болатын
Денсаулық сақтау министрі Ажар Ғиният 15 маусымда сенат отырысында Алматының Орталық қалалық клиникалық ауруханасында 3 науқастың АИТВ инфекциясын жұқтыру фактісіне қатысты пікір білдірді, деп хабарлайды Qaz365.kz.
Ажар Ғинияттың айтуынша, дәрігерлер инфекция аурухана ішінде тарап кетуін болдырмауға тырысып жатыр.
"Тексеруден өткен бойда біз толық ақпарат береміз. Енді толық эпидемиологиялық тексеру жүргізіп, инфекцияның ошағын, жұқтыру жолын, ауруханаішілік инфекция болған-болмағанын түсінуіміз керек. Ол жерге министрлік пен комитеттер жіберілді", – деді министр.
Ол 2022 жылы 4 мың қазақстандық АИТВ жұқтырғанын айтты. Ал 2021 жылы 3,5 мың жағдай тіркелген.
Еске салайық, 14 маусым күні Алматыда ауруханаға түскен науқастар АИТВ инфекциясын жұқтырып алғаны анықталған болатын.
