Думан Мұхаметкәрім екі бап бойынша күдікті деп танылды
Мәдениет және ақпарат министрі Аида Балаева Думан Мұхаметкәрімнің ұсталуына қатысты журналистердің сұрақтарына жауап берді, деп хабарлайды Qaz365.kz.
Журналист Думан Мұхаметкәрім Қылмыстық кодекстің «Тыйым салынған ұйымның ісіне араласу» (405-баптың 2-бөлігі) және «Экстремизмді қаржыландыру» (258-бап, 1-бөлігі) баптары бойынша күдікті деп танылды. Оның айыпталуына оппозициялық саясаткер Мұхтар Әблязовпен сұхбаты ықпал етті.
Журналистер аталған жағдайға байланысты министр Аида Балаевадан азаматтық ұстанымын сұрады.
«Біз құқықтық мемлекетте өмір сүреміз. Заң бәрімізге бірдей. Егер қылмыстық істер қозғалса, яғни оған себеп бар. Ақпарат министрлігі болсын, өзге министрлік болсын немесе жеке адамдар болсын құқық қорғау органдарына ықпал жасай алмаймыз», – деді Аида Балаева.
БАҚ өкілдері министрге Думан Мұхаметкәрімнің өз ойын ашық айтқаны үшін ұсталғанын айтты.
«Әр істің егжей-тегжейін қарауымыз керек. Мен сіздер білетін ақпараттан артық, басқа ақпарат білмеймін. Сондықтан бұл сұраққа нақты жауап бере алмаймын. Іс қозғалды. Қазір ол кісі сотты күтіп отырғанын ғана білемін», – деп жауап берді министр.
Еске салайық, Думан Мұхаметкәрім маусым айында 25 күндік қамаудан шығуы керек болған. Алайда оны кейін қылмыстық іс бойынша жауапқа тартып жатқаны белгілі болды.
