Тыйым салынған сөздерді айтқаны үшін 17 миллион теңге айыппұл арқалауға болады
Әуежайда аңдамай сөйлеп, айыппұл арқалау қаупі бар, деп хабарлайды Qaz365.kz тілшісі Еуразия бірінші арнасына сілтеме жасап.
Әуежайда тыйым салынған сөздерді айтса, бес жылға дейін бас бостандығынан айыру жазасына дейін көзделген. Қамамаса да, қосымша тінтуге тап болып, ұшақтан қалып қою қаупі бар.
«Террорист», «терроризм», «террор», «бомба» деген сөздерді әуежайда айтуға болмайды. Егер осы актіге қатысыңыз болмаса, мейлінше айтпау керек. Мұны терроризм актісі бойынша жалған ақпарат беру деп атаймыз. Кейбір адамдар «жүгімде бомба бар» деп әзілдеп жатады, бірақ бұл әзілдің арты қылмыстық жауапкершілікке алып келетінін көбісі білмейді», – деді Астана халықаралық әуежайының ресми өкілі Тойгүл Жұбанісова.
Тілшілер әуежайдағы адамдардан тыйым салынған сөздер жайлы сұрап көрді. Олардың көбі аталған сөздер жайлы білмейтін болып шықты.
«Ұшақпен ұшып жүргеніме екі жыл болды, бірақ бірінші рет естіп тұрмын», «Білмейді екенмін», «Жоқ, естімеппін» деп жауап берді олар.
Ал полицейлердің айтуынша, биылдың өзінде тыйым сөздерді айтқаны үшін Астана әуежайында 41 рет дабыл қағылған, оның ішінде 29 жолаушының кінәсі дәлелденіп, іс сотқа жолданған.
Сондай-ақ жолаушылардың ұшаққа алып өте алмайтын заттарының тізімі бар. Мысалы, су мен әтірді 100 миллилитрден артық алып өтуге болмайды және баланың ойыншық тапаншасымен бортқа кіруге рұқсат жоқ.
