ДНҚ қорытындысы шықты
«Бармысың, бауырым?» бағдарламасының жүргізушісі Қымбат Досжан бельгиялық отбасы асырап алған қазақ баласы Жәнібектің әкесі болуым мүмкін деп бір жігіт хабарласқанын айтқан еді. Бүгін Бауыржан есімді жігіттің тапсырған ДНҚ қорытындысы шыққаны белгілі болды, деп хабарлайды Qaz365.kz.
Қымбат Досжанның айтуынша, Жәнібек пен Бауыржанның арасында ешқандай туыстық байланыс жоқ.
«Мен Жәнібектің әкесі болуым мүмкін» деп ДНҚ анализ тапсырған Бауыржанның нәтижесі 0 пайыз болып шықты», - дейді ол.
Қымбат Досжан «Бармысың, бауырым?» хабары Еуропада өскен, бельгиялық жалғызбасты әйел асырап алған қазақ баласының туған анасын іздеуді жалғастыра беретінін жеткізді.
Айта кетейік, 21 жастағы Эдди Жанға дүниеге келгенде Жәнібек деген есім берілген екен. Алайда қазір Эдди Жан өзін Мұрат деп атайды. Қымбат Досжан оған анасын табуға көмектесіп жүр.
