Бұндай мәлімдеме жасауына ҚХП туралы жазба себеп болған
Қазақстанның бұрынғы Мәдениет және ақпарат министрі, Қазақстан Халық Партиясының қазіргі төрағасы Ермұхамет Ертісбаев блогер Еділовты сотқа беретіні туралы мәлімдеді, деп хабарлайды qaz365.kz тілшісі.
Бұндай мәлімдеме жасауына yedilovonline телеграм арнасындағы ҚХП туралы жазба себеп болған.
«ҚХП көп адам шығып жатыр. Тіпті, Жамбыл Ахметбеков сияқты маңызды фигуралар да шыққанын мәлімдеді. Халық партиясының коммунистік өткенін айтпағанда, бұл партияға ешкім бәс тікпейді» - деп жазды өз телеграм арнасында Еділов.
Ертісбаев бұл ақпаратты жоққа шығарды. Партияның имиджіне кір келтіріп, жалған ақпарат таратқаны үшін Еділов 10 млн тенге айыппұл төлеуі керегін айтты.
«Бұл – өтірік, жалған айып! Партиядан қанша адам шығып жатқанын ол қайдан біледі? Еділов менің телефон нөмірімді біледі. Қызық болса, офисімізге келіп, анық-қанығын білсін. Көптеген блогер ақшаға пост жазатынын білемін. Жалған ақпарат таратқаны үшін қанша айыппұл салатынын естеріңізге сала кетейін. 3000 АЕК немесе 800 сағат қоғамдық жұмысқа салынады. Көктем келе жатыр, бір ай қар тазалап, дала сыпырғысы келмесе, жазған сөзі үшін кешірім сұрасын. Мен қалжыңдап тұрған жоқпын, егер кімде-кім біздің партияны қаралайтын болса, біз заң жүзінде әрекет етеміз», – деді ол.
