Қырғызстан президенті Садыр Жапаров мемлекеттік саяси аренадағы ең шулы оқиғалардың бірі – Қамшыбек Ташиевтің отставкасына қатысты алғаш рет ресми мәлімдеме жасады. «Kabar.kg» агенттігіне берген сұхбатында мемлекет басшысы бұл шешімнің астарында қандай себептер жатқанын ашып айтты, деп хабарлайды Qaz365.kz.
Президент Садыр Жапаров Ұлттық қауіпсіздік мемлекеттік комитетінің (ҰҚМК) бұрынғы басшысы Қамшыбек Ташиевті қызметінен босату туралы шешімін ел ішіндегі жікшілдікке жол бермеу қажеттілігімен түсіндірді.
Биліктегі «екіге бөліну» қаупі
Жапаровтың айтуынша, Жогорку Кеңеш депутаттары мен мемлекеттік қызметкерлер арасында «президент жағы» және «генерал жағы» (Ташиев) деген түсінік қалыптаса бастаған. Жекелеген топтар тарапынан «кімнің жағындасың?» деген сұрақтар қойылып, саяси элита екіге жарылу алдында тұрған.
Президентте мемлекеттік қызметкерлерді «генералдың» атымен қорқытып, «біздің жаққа өтпесеңіз, генералмен күресесіз» деген секілді қоқан-лоқылар жасалғаны туралы нақты дәлелдер болған.
Егер бұл жағдай дер кезінде тоқтатылмаса, жікшілдік қарапайым халық арасына тарап, елдің тұтастығына қауіп төндіруі мүмкін еді.
Шешім қабылдау процесі
Президент жарлыққа қол қоймас бұрын Ташиевке хабарласып, қалыптасқан жағдайды егжей-тегжейлі түсіндіргенін айтты. Сонымен қатар бұл қадамның мерзімінен бұрын президент сайлауын өткізуді талап еткен 75 адамның хатына тікелей қатысы бар-жоғы туралы сұраққа Жапаров былай деп жауап берді:
«Тіке қатысы бар деп айта алмаймын. Бәлкім, ол сол адамдардың немесе соны ұйымдастырғандардың әсеріне ұшыраған болуы мүмкін».
Ташиевтің реакциясы
Еске сала кетейік, 10 ақпанда Қамшыбек Ташиев Министрлер кабинеті төрағасының орынбасары және ҰҚМК төрағасы қызметінен босатылған болатын. Саясаткерге жақын журналист Нұрғазы Анарқұлов жариялаған мәлімдемеде Ташиев бұл шешімді күтпегенін, бірақ президент бұйрығына бағынатынын жеткізген.
