Симона Гальперин Израиль палестиналықтарға көмек көрсетуге қарсы емес екенін жеткізді
Израиль Сыртқы істер министрлігі бас директорының Еуразия және Балқан елдері бойынша орынбасары Симона Гальперин 2023 жылғы 7 қарашада өткен брифингте Қазақстанның Палестинаға гуманитарлық көмек ретінде бөлген миллион долларына қатысты көзқарасын білдірді, деп хабарлайды Qaz365.kz тілшісі Zakon.kz-ке сілтеме жасап.
Симона Гальперин Израиль палестиналықтарға көмек көрсетуге қарсы емес екенін жеткізді.
"Израиль палестиналықтарға көмектесуге қарсы емес. Израиль палестиналықтармен емес, ХАМАС-пен соғысып жатыр. Израильдің айтатыны, мен бұл туралы тағы да анықтап айтқым келеді, бұл көмек ХАМАС-қа емес, террористерге емес, палестиналықтарға берілуі керек. Көмек ауруханаларға, мектептерге, балабақшалар салуға, экономикаға баруы керек", – деді Симона Гальперин.
Ол соңғы жылдары палестиналықтар басқа мемлекеттерге қарағанда әртүрлі халықаралық ұйымдар мен елдерден көп гуманитарлық көмек алғанын айтты.
"Өкінішке қарай, соңғы онжылдықтарда палестиналықтар БҰҰ мен басқа ұйымдардан басқа адамдарға қарағанда көбірек көмек алды. Бірақ бұл көмек қайда? Сумен қамтамасыз ету мен өнеркәсіптің, экономиканың, мектептер мен ауруханалардың орнына оның бәрі жер астында, ХАМАС-тың туннельдерінде жатыр. Сондықтан біз палестиналықтарға көмектесуге мүлдем қарсы емеспіз, бірақ бұл көмек Палестинаның бейбіт тұрғындарына берілуін талап етеміз", – деді ол.
Қазақстан Президенті Қасым-Жомарт Тоқаев Түркі мемлекеттері ұйымының 10-саммитінде Палестинаға гуманитарлық көмек ретінде 1 миллион доллар бөлу туралы шешім қабылдағанын мәлімдеді.
Сырты істер министрлігінің ресми өкілі Айбек Смадияров ҚР Үкіметі бөлген қаражат Біріккен Ұлттар Ұйымының Таяу Шығыс агенттігіне аударылғанын айтты.
