1380 теңге – бұл коммерциялық емес, символикалық төлем
Продюсер Жан Мұқанов Сәкен Майғазиевтің ұлының үйлену тойының ақылы трансляциясына қатысты сынға жауап берді. Әлеуметтік желілерде жариялаған мәлімдемесінде ол бұл жай ғана отбасылық мереке емес, кәсіби көзқарасты талап ететін маңызды мәдени оқиға екенін атап өтті, деп хабарлайды Qaz365.kz.
«Бұл сериал да, концерт те емес, тіпті кәдімгі той да емес. Бұл – ұлттық мәдениет, отбасылық құндылықтар мен танымал адамның өмір жолы тоғысқан ерекше оқиға. Мұны әдемі әрі әсерлі етіп көрсету үшін ондаған кәсіби маман жұмыс істейді: режиссерлер, операторлар, дыбыс режиссерлері, тікелей эфир ұйымдастырушылары. Мұның бәрі белгілі бір шығынды қажет етеді», – деді Мұқанов.
Ол 1380 теңге көлеміндегі сома – бұл коммерциялық мақсаттағы баға емес, техникалық шығындарды өтеуге арналған символикалық төлем екенін қосты.
«Мұндағы мақсат – табыс табу емес. Бұл – мәдени жадымызды сақтау туралы. Мұндай формат – алға қарай жасалған қадам. Әлемде бұл бұрыннан қалыптасқан тәжірибе: британ монархтарының үйлену тойларының трансляциясы, Victoria’s Secret шоулары, Netflix премьералары – бәрі де ақылы контент. Ендеше, біз неге Сәкен Майғазиевтің тойын кәсіби әрі құрметпен көрсетпеске?» – деді продюсер.
Ол трансляцияның толықтай ерікті екенін атап өтті.
«Біз ешкімді мәжбүрлеп жатқан жоқпыз. Қалаған адам көреді. Қаламаған адам көрмейді. Ал біз өз жұмысымызды мақтанышпен әрі жауапкершілікпен жалғастыра береміз. Өйткені бұл жай ғана той емес – бұл тарих», – деп қорытындылады Мұқанов.
