Сот оның қаржылық жағдайын әдейі төмендеткенін анықтады.
Астанадағы кәмелетке толмағандардың істері жөніндегі мамандандырылған ауданаралық сот Қуандық Бишімбаевтың бұрынғы жары Назым Қаһарманға қатысты алимент төлемін азайту жөніндегі шағымын қарады, деп хабарлайды Qaz365.kz.
Сот отырысында Бишімбаев ай сайынғы 1,6 миллион теңге көлеміндегі алиментті төмендетуді сұрады. Ол бостандықтан айырылғанын және ресми табыс көзінің жоқтығын алға тартқан.
Бұдан бөлек, ол балалар кәмелеттік жасқа жеткеннен кейін де төленетін қосымша шығындарды - қосымша білім, медициналық қызмет, жыл сайынғы демалыс шығындарын (ел ішінде және шетелде, оның ішінде жол ақысы, тұру, тамақтану мен сақтандыру) келісімшарттан алып тастауды талап етті.
Алайда сот бұл талаптарды қабылдамады. Себебі Бишімбаевтың қаржылық жағдайын әдейі төмендеткені анықталды - ол 2024 жылдың тамызында сот процесінің алдында өз мүлкін тегін түрде үшінші тұлғаларға берген.
Сот шешімі әзірге заңды күшіне енген жоқ.
