Жер сілкінісі кезінде қалай әрекет ету керек
Түркия мемлекетінің құтқарушылары жер сілкінісі кезінде қалай әрекет ету керектігі туралы кеңес айтты, деп хабарлайды Qaz365.kz.
«Сіздерге бірдеңе айтайын. Жер сілкінісі кезінде тіпті диванның немесе кереуеттің қасында жатсаңыз да, аман қалуыңыз мүмкін. Қашу – ең қауіпті нәрсе. Бастысы – қашпау керек. Үйінділер астында біз марқұмдардың денесін негізінен баспалдақ үстінде табамыз. Дереу қаттылау жерге тұруға тырысыңыз. Өзіңізбен бірге сумен бір қант болуы қажет. Бұл сіздің күшіңізді сақтауға көмектеседі. Өйткені қант адамның ұзақ уақыт тірі қалуына көмектеседі. Сондай-ақ өзіңізбен бірге дауысыңызды еститіндей бірдеңе алып жүруге тырысыңыз. Бұл бәлкім телефон болуы мүмкін. Оның дауысын қосып, белгі беруге болады. Біраз уақыттан кейін адамның күші қалмайды. Тағы да қайталап айтамын, қашпауға тырысыңыз», – дейді түркиялық құтқарушы.
Естеріңізге сала кетейік, 2023 жылдың 6 ақпанында тоғыз сағаттық интервалмен Түркияның оңтүстік-шығысында екі үлкен жер сілкінісі болды. Яғни Түркияның оңтүстік-шығысында 7,7, және 7,6 балдық жер сілкіністері болып, дүмпуі Сирияны да әбігерге салған. Ресми дерек бойынша, Түркияның өзінде ғана апат салдарынан 50 мыңнан астам тұрғын қаза тауып, 107 мыңнан астам зардап шеккен.
Бұған дейін 23 қаңтар сағат 00.09-да Алматыда 5 балл зілзала болып, қала тұрғындары үйлерінен сыртқа шыққан, кейбірі жылы киім киіп те үлгермеген еді.
