«Алтын Орда» базары төңірегіндегі тайталас: Экс-атқарушы директор Марқабаевқа есірткі салып жіберген – адвокат

Қырғыз азаматы, Алматыдағы «Алтын Орда» базары директорының орынбасары болған Ермек Марқабаев бүгін соттағы соңғы сөзін айтты, деп хабарлайды Qaz365.kz.

Еске сала кетейік, ол былтыр Алматы – Бішкек тасжолында 2 маусымда ұсталған. Кейіннен Ішкі істер министрлігі оған есірткі, қару-жарақ пен жарылғыш заттарды заңсыз алып жүрді деген айып тағылғанын хабарлаған.

Сол кезде әлеуметтік желіде Марқабаевты қарулы күш тобы ұстап жатқаны түсірілген видео тараған болатын. Айыпталушының өзі мен адвокаты біреулер аяқтан шалу үшін осындай қитұрқы әрекетке барды деп санайды.

Ермек Марқабаев соттағы соңғы сөзінде ұсталуын нарықтағы монополиямен күресу әрекетімен байланыстыратынын айтты.

«Менің түрмеде отырғаныма 8 ай болды және мені неге бұлай қорлағанын түсіне алмаймын.  Өзім базар нарығы мен қазақстандықтардың игілігі үшін адал еңбек еттім. «Алтын Орда» базарындағы монополияға қарсы күрескеніме байланысты осылай құрбан болып отырмын. Қызметте жүргенде кім хабарласып өтініш айтпады десеңізші?! Арасында қорқытып, үркіткендер де жетерлік. Мен заңға бағынатын азаматпын, ешқашан заң бұзған емеспін», – деді ол.

Бұған дейін прокурор базар директорының бұрынғы орынбасарын 5 жылға бас бостандығынан айыруды сұраған болатын. Оған есірткі сақтады деген айып тағылып отыр.

Айыпталушының адвокаттары есірткіні Марқабаевқа салып жіберген деп санайды. 

Адвокаты Динара Жұбатованың айтуынша, оған ҚР ҚК 296-бабы 4-бөлігі (Аса ірі мөлшердегі есiрткi, психотроптық заттарды, сол тектестерді өткізу мақсатынсыз заңсыз дайындау) бойынша тергеу жүргізілген. Қорғауындағы азамат дініне берік, есірткіге мүлдем жоламайтын жан дейді. Күніне бес рет намазын қаза қылмапты.

«Полиция қызметкерлеріне сол кезде қоңырау түседі. Бірден шұғыл қимылдап, Алматы – Бішкек тасжолына жетіп барады. Сосын біртіндеп көліктерді тоқтата бастайды. Бір қызығы, олар қандай нөмір екенін білмеген. Сөйтіп, олар атыс қаруын таппайды. Көлікке қару салуға батылдары жетпейді. Себебі, ол қарудың кейін қайдан алынғаны анықталуы мүмкін. Сондықтан есірткіні таңдаған», – дейді  Динара Жұбатова.

Ол кәсіпкерден 1,796 грамм "мефедрон" табылғанын атап өтті. Егер оның кінәсі дәлелденсе, бұл қылмыс үшін бас бостандығынан айыру мерзімі үш жылдан жеті жылға дейін болуы мүмкін.
Бірақ адвокаты қан және несеп анализін тапсырғанда ондай ештеңе болмаған деп отыр.