Ол еден жуатын анасына көмектесетінін айтты
Әлеуметтік желіде әкесін сағынған кішкентай Айша есімді қыздың видеосы таралды. Бейтаныс кәсіпкер кішкентай қызбен сөйлесіп, мектепке дайындығы жөнінде сұрайды. Кейіннен Айшаны киіндіріп, үйіне азық-түлік жеткізіп береді, деп хабарлайды Qaz365.kz.
Айша есімді кішкентай қыздың айтуынша, оларды әкесі тастап кеткен.
«Әкеміз бізбен бірге тұрмайды. Ол киімін жинап кетіп қалған. Сіздің иісіңіз менің әкемнің иісіндей екен. 2-сыныпқа барамын. Мектеп формасы мен қалам-дәптер алмадық», - дейді кішкентай қыз.
Ол еден жуатын анасына көмектесетінін атап өтті.
«Көпқабатты үйдің 18 қабатынан 7 қабатына дейін сыпырамын. Анама көмектесемін. Ол еден жуады», - дейді Айша.
Кәсіпкер жігіт кішкентай қыз бен оның ағасын жаңа оқу жылына дайындап, керек-жарақтың барлығын алып берді. Тіпті, телефонына дейін алып берген. Сондай-ақ үйіне қажетті азық-түлікті жеткізіп берді. Кішкентай Айшаның көңіл-күйін көтеріп, қонжық пен гүл сыйлады.
«Мектепке де дайын болмадық. Сабақтың басталуына 1-2 күн қалып еді. Сондықтан осындай көмектеріңізге көп рахмет. Алла разы болсын», - деді Айшаның анасы.
