Бұл туралы ақпаратты спорт инсайдері Майкл Бенсон әлеуметтік желіде таратқан
Қазақстандық танымал боксшы, қазіргі ҰОК басшысы Геннадий Головкин шаршы алаңға қайта оралмақ, деп хабарлайды Qaz365.kz тілшісі 1bol.kz-ке сілтеме жасап.
Бұл туралы ақпаратты спорт инсайдері Майкл Бенсон әлеуметтік желіде таратқан.
“Геннадий Головкиннің Монте-Карлода Баду Джекпен жұдырықтасады. Айқас 13 наурызда өтеді”, – делінген спорт инсайдерінің жазбасында.
Головкин лауазымды қызметке тағайындалған соң, көпшілік оны рингпен қоштасты деп тұжырымдады, алайда былғары қолғап шеберінің өзі бұған қатысты ресми мәлімдеме жасамаған.
Геннадийдің өзі мексикалық Сауль Альвареспен үшінші айқасынан соң жұдырықтасқан жоқ. Осыдан біраз уақыт бұрын Головкин Теренс Кроуфордпен жұдырық түйістіреді деген сыбыс тарады. Алайда ол да расталмаған болатын.
“Майкл Бенсонның инсайды көбінде шындыққа жанасымды болғанымен, оған күмән келтіретін дүние де жоқ емес. Бұлай дейтініміз Баду Джек бірінші ауыр салмақта өнер көрсетсе, GGG ешқашан орта салмақтан жоғарыламаған”, – делінген спорттық ақпарат агенттігінің мақаласында.
