Қазақстандық спортшылар осы байрақты бәсекеде жалпы 14 медаль қанжығаға байлаған
ХХХІІ Дүниежүзілік қысқы универсиада өз мәресіне жетті, деп хабарлайды Qaz365.kz.
Бұл туралы ҚР Ғылым және Жоғаыры білім министрлігі ел студенттерінің байрақты бәсекедегі жетістігімен бөлісіп, мәлімдеме жасады.
“13-23 қаңтар аралығында Италияның Турин қаласында өткен жарыста еліміздің жас спортшылары үлкен жетістіктерге қол жеткізіп, Қазақстанның мәртебесін биіктетіп қайтты. Бұл бәсекеде ұлттық және жастар құрамаларынан 103 спортшымыз әлемнің үздіктерімен күш сынасып, ел намысын абыроймен қорғады. Олардың жеңісі – тек жеке жетістіктер емес, еліміздің спорттағы елеулі жетістігі, зор табысы. Қазақстандық студенттеріміз 3 алтын, 4күміс және 7 қола медальді еншілеп, көк байрағымызды жеңіс тұғырында желбіретті. Нәтижесінде Қазақстан жалпыкомандалық есепте 57 мемлекеттің арасынан 12 орынға табан тіреді. Бұл – еліміздің спорттағы биік жетістігі. Спорт – тек денсаулықтың кепілі ғана емес, ол мемлекеттің халықаралық аренадағы беделін арттырып, ұлттың рухын нығайтатын ұлы күш. Білімді, тәрбиелі әрі дені сау ұрпақ – ел болашағының мызғымас негізі”, – делінген министрліктің хабарламасында.
Сондай-ақ министрлік жеңіс тұғырынан көрінген студенттерге құттықтау жолдаған.
“Құрметті спортшылар, сіздер тек өз шеберліктеріңізді көрсетіп қана қоймай, еліміздің атын әлемге танытып, жастарға үлгі болдыңыздар. Универсиададағы жетістіктеріңіз осы игі дәстүрдің лайықты жалғасы екеніне сенімдімін. Барша жеңіс тұғырынан көрінген студенттерімізге, олардың жаттықтырушылары мен жоғары оқу орнының барша ұжымына, спортшылардың ата-аналарына шексіз алғысымды білдіремін. Сіздердің жеңістеріңіз – тек спорттық табыс қана емес, тұтас Қазақстан халқының мақтанышы, мерейі.Алдағы жарыстарда да жарқын жеңістерге жетулеріңізді тілеймін. Ел сенімін ақтап, жеңіс тұғырынан көрініп, абыройларыңызды одан әрі арттырып жүре беріңіздер!”, – делінген министрліктің құттықтау хабарламасында.
