Ұлттық құрама 112-орында тұр
Халықаралық футбол федерациясының (ФИФА) жаңа рейтингісінде қазақстандық футболшылар 8 сатыға көтерілді. Қазір ұлттық құрама 1177,5 ұпай жинап, 112-орында тұр, деп хабарлайды Qaz365.kz тілшісі Zakon.kz-ке сілтеме жасап.
Магомед Адиев шәкірттерінің әлемдік рейтингіндегі бұл көрсеткіші 2024 жылғы Еуропа чемпионатының іріктеу кезеңіндегі Дания құрамасына қарсы сенсациялық және тарихи жеңісімен байланысты болды. Кездесуде скандинавиялықтардан 0:2 есебімен ұтылып жатқан қазақстандықтар ақыры 3:2 есебімен жеңісті жұлып алды. Қазақстан құрамасына жеңісті Бахтиёр Зайнутдинов, Асхат Тағыберген және Абат Айымбетовтің голдары әкелді.
ФИФА баспасөз қызметінің хабарлауынша, әлемнің үздік құрамаларының тізімін Катарда өткен соңғы әлем чемпионатының жеңімпазы Аргентина құрамасы бастап тұр.
Оңтүстік америкалықтар 1840,93 ұпаймен бірінші орында.
Үздік үштікке Франция (1838,45) және Бразилия (1834,21) кірді. ФИФА-ның үздік ондығына сонымен қатар Бельгия, Англия, Нидерланды, Хорватия, Италия, Португалия және Испания кірді.
