Оған демеушілер тарапынан көлік берілді
Спорттық гимнастикадан Париж Олимпиадасында күміс медаль иеленген қазақстандық Нариман Құрбановтың еңбегі ескерусіз қалмады. Оған демеушілер тарапынан көлік берілді, деп хабарлайды Qaz365.kz.
Спортшы Skoda Kodiaq көлігіне ие болды.
Айта кетейік, бұған дейін отандық спорт гимнастикасы тарихында Олимпиададан тұңғыш жүлде алған Нариман Құрбановтың еңбегі ескерілмеді деген сын желіде қызу талқыға түскен.
«Сізді Қазақстанда қалай күтіп алғанына көңіліңіз толды ма? Елдос Сметовті қалай қарсы алғанын көрдік. Көлік пен пәтер сыйлап жатыр. Сіз назардан тыс қалдым деп ойламайсыз ба? – деп тілшілер спортшыдан сұраған еді.
Бірақ ол ескерусіз қалғанына ренжімейтінін айтқан болатын.
«Иә, машина да, үй де берілмеді деген жазбаларды көп оқимын. Бірінші кезекте осындай қолдау көрсетіп жатқан жанкүйерлерге алғысым шексіз. Бірақ, мен уақыты келгенде өзіме тиістінің бәрін аламын. Егер одан да артығы керек болса, мен оған ақша табамын. Тек мынаны ғана айтайын: қазір менің өмірімде болып жатқан оқиғалар мені шынымен бақытты етеді», – деген еді атлет.
