Ол Әліптен түсіндірме беруін талап етті
Қазақстандық футболшы, «Зенит» клубының қорғаушысы Нұралы Әліп бірнеше күн бұрын ресейлік арналардың біріне берген сұхбатында ұлттық құраманың бас бапкері Станислав Черчесовке қазақ тілінде сұрақ қойған журналистің әрекетіне қатысты пікір білдіріп, оны «хайп жасады» деп айыптаған болатын. Белгілі журналист Нұрсұлтан Құрман футболшының айыптауына қатысты жауап берді, деп хабарлайды Qaz365.kz.
Журналист әлеуметтік желідегі парақшасында оның қазақ тілінде сұрақ қоюы хайп жинау үшін емес екенін қадап айтты.
«Нұралы, сен өзің маңғаз Маңғыстаудың, қазақылықтың иісі аңқып тұрған, тілдің үстемдігін шырақ етіп ұстап отырған өлкенің тумасысың. Маңғыстауда әрбір қарагөз ана тілінде сөйлейді. Қазақ тілі үшін жанын беруге дайын. Өзге ұлт өкілдері де ол жақта қазақша сөйлейтіні рас қой. Оған Ақтауға барған сайын куә болып жүрміз. Сондықтан, Нұралы, сенің бұл жерде не айтқың келгенін түсінбедім. Шыны керек, маған хайп мүлдем керек емес. Ол үшін жүрген адам емеспін. Бұл жерде қазақ футболы деп жүрміз. Ең бастысы, ұлт мүддесі, тіл тағдыры бірінші кезекте тұруы керек. Ол біздің қызметіміз болсын немесе мансабымыздан жоғары тұратын нәрсе - ол тіл. Расул Ғамзатовтың өзі «тілім өлсе, бүгін өліп кетуге дайынмын» деген екен. Нұралы, сен есіңді жи, әліңді біл. Бұл хайп үшін жасалған жоқ. Қазақ жерінде футбол федерациясында баспасөз мәслихаты қазақ тілінде өтуі керек. Керек болса, оған аударып берсін. Мен Черчесовке қазақша жауап бер деп талап еткен жоқпын. Сұрағымды қазақша қойдым. Біз тәуелсіздік алғалы отыз жылдан асып бара жатыр. Елу жылда ел жаңа дейді. Біз жаңарған елміз. Жаңа толқын пайда болды және менің де, сенің де ұлт алдындағы миссиясы ол - келесі ұрпаққа біздің тіліміз бен мәдениетімізді саф ретінде аманат етіп жеткізу. Дәл осы жолда біз айнымауымыз керек. Бірақ мынау сенің Петерборда отырып алып, «хайп үшін жасалды, әрбір журналист орысша түсінеді» деп мәлімдеме жасауың өте қате. Оны біздің ақпарат саласының қызметкерлері де, қалың қазақ жанкүйерлері де дұрыс түсінбей отыр», - деді белгілі журналист.
Сондай-ақ, Нұрсұлтан Құрман өз үндеуінде Нұралы Әліптен аталған пікірі үшін қалың елге түсіндірме беруін талап етті. Ол өз сөзінде қай елде болсын кез келген маманға сол мемлекеттің ана тілінде сауал қойылатынын нақты айтты.
Айта кетейік, ресейлік жаттықтырушы Станислав Черчесов Қазақстан құрамасына бас бапкер болып тағайындалғаннан кейін журналистермен кездескен. Сол жиында журналистердің бірі бапкерге қазақша сұрақ қойып, оның ашуын тудырған. Тіпті, Черчесов тек орыс тілінде сұрақ қоюды талап еткен болатын. Осы оқиғаға қатысты пікір білдірген қазақстандық футболшы Нұралы Әліп сұрақ қоюшыны «хайп жасады» деп айыптаған еді.
