Желі қолданушылары кәсіпкердің әрекетін құптады
Қазақстандық кәсіпкер Кеңес Рақышев Париж Олимпиадасының чемпионы Елдос Сметов пен қола жүлдегер Ғұсман Қырғызбаевқа көлік мінгізді, деп хабарлайды Qaz365.kz.
Бұл туралы Шымкент қаласы дене шынықтыру және спорт басқармасының басшысы Маратбек Мықтыбеков Instagram парақшасында жазды.
«Кеңес Хамитұлы (Рақышев - ред) қос батырымыз Елдос пен Ғұсманға берген уәдесін орындап, темір тұлпардан мінгізді. Алла сізге разы болсын Кеңес мырза», - деп жазды Маратбек Мықтыбеков.
Желі қолданушылары кәсіпкердің әрекетін құптап, спортшыларға көрсеткен қолдауы үшін алғыс білдіріп жатыр.
Париж татамиінде 60 келіге дейінгі салмақта белдескен Елдос Сметов финалда француз дзюдошы Лука Мхеидзені жеңіп, чемпион атанды.
Ал Ғұсман Қырғызбаев (66 келі) қола жүлдеге таласта сербиялық дзюдошы Страхинья Бунчичтен басым түсті.
