Оларға 10 жылдан 15 жылға дейін бас бостандығынан айыру жазасы қарастырылған
Жыл басынан бері «Трамадолды» заңсыз сақтағаны үшін үш адам қамауға алынды. Олардан 2,5 мыңнан астам таблетка тәркіленді, деп хабарлайды Qaz365.kz.
Бұл туралы ҚР ІІМ баспасөз қызметі мәлімдеді.
«Медицинада қолданылатын психотроптық заттар мен есірткілерді рецептісіз сату Қылмыстық кодекстің 297-бабы 3-бөлігімен қаралып, есірткіні заңсыз өткізу болып саналатынын ескертеміз. Бұл үшін 10 жылдан 15 жылға дейін бас бостандығынан айыру жазасы қарастырылған», – деді Есірткі қылмысына қарсы іс-қимыл комитеті басқармасы бастығының орынбасары Айбек Брыков.
Еске сала кетейік, 2023 жылы «Трамадол» психотроптық заты есірткі заттарының тізіміне енгізілген. Ол дәрігердің рецепті бойынша тиісті лицензиясы бар дәріханаларда ғана сатылады. ҚР ІІМ «Трамадолды» заңсыз сатуға қылмыстық жауапкершілік қарастырылғанын тағы да ескертіп отыр.
