Щучинск қаласында рекреациялық аймаққа тиесілі жерлер мемлекетке қайтарылды
Ақмола облысында мемлекетке рекреациялық аймағындағы құны 567 млн теңгеден астам жер телімі қайтарылды, деп хабарлайды Qaz365.kz.
Бұл туралы ҚР Бас прокуратурасы мәлімдеді.
“Құқықтық актілерді бағалау барысында жер заңнамасының бұзылуы анықталды, бұл бұзушылық жер ресурстарын басқару бөлімімен коммерциялық орман өсіру үшін жеке тұлғаға 36 гектар жертелімін заңсыз беру арқылы көрініс тапқан, аталған жер телімі халықтың демалысы мен сауықтыруына арналған рекреациялық аймаққа тиесілі болған. Қадағалау актісі бойынша жер ресурстарын басқару департаменті сотқа жүгінді. Мамандандырылған ауданаралық экономикалық соттың шешімімен жасалған келісім жарамсыз деп танылып, кадастрлық құны 567 млн теңге тұратын жер телімі рекреациялық мақсаттағы жерлер құрамына қайтарылды”, – делінген прокуратура хабарламасында.
Қабылданған қадағалау шаралары нәтижесінде Щучинск қаласында рекреациялық аймаққа тиесілі жерлердің құқықтық режимі қалпына келтірілді. Жер телімінің рекреациялық қорға қайтарылуы аумақтың экологиялық теңгерімін сақтауға және оның мақсатсыз пайдаланылуына жол бермеуге мүмкіндік береді.
