Ұсталған азамат интернет-дүкенде есірткі тасымалдаушы ретінде жұмыс істеген
Павлодарда қадласында жеткізу қызметімен айналысқан мопед жүргізушісінен есірткі тәркіленді, деп хабарлайды Qaz365.kz.
Бұл туралы өңірлік Полиция басқармасы мәлімдеп отыр.
“Павлодар қаласындағы Мүткенов көшесінде “Қарасора” іс-шарасын жүргізу барысында полиция қызметкерлері 32 жастағы ер адамды ұстады. Жеке тексеру кезінде оның үстінен екі полиэтилен орамға оралған тыйым салынған заттар табылды. Күдіктінің тұрғылықты мекенжайын тінту кезінде дәретханаға жасырылған қосымша 6 орама мен бір пакет, сондай-ақ "зип" пакеттер, электронды таразы және орауға арналған құрылғы тәркіленді. Сараптама қорытындысына сәйкес, алынған заттардың салмағы 8 грамнан асатын синтетикалық есірткі болып шықты. Ұсталған азамат интернет-дүкенде есірткі тасымалдаушы ретінде жұмыс істегенін мойындады”, – делінген полиция хабарламасында.
Ол есірткі заттарын жасырып кету арқылы таратуды жоспарлаған. Қазіргі уақытта ҚР ҚК бойынша есірткі құралдарын немесе психотроптық заттарды заңсыз дайындау, қайта өңдеу, сатып алу, сақтау, тасымалдау, жөнелту немесе өткізу фактісі бойынша қылмыстық іс қозғалды. Күдікті қамауға алынды, қылмысқа қатысы бар басқа тұлғалар анықталуда.
