Депутаттың сауалына министр Аида Балаева жауап берді
Мәжіліс депутаты Ринат Зайытов елде ұлтараздықты қоздыратындарға қатысты екі түрлі стандарт бар екенін айтып, Мәдениет және ақпарат министрі Аида Балаеваға сауал тастады, деп хабарлайды Qaz365.kz.
«Жасыратыны жоқ, біздің мемлекетте екі түрлі стандартпен өмір сүретін жағдай өте көп. Ұлтараздықты қоздырмаймыз деп, қазақ ұлтының мүддесін қорғаған адамдарды қамаймыз, жазалаймыз, айыппұл саламыз. Ал арамызда жүріп, соғысты, әлеуметтік нәсілдікті, мемлекет қауіпсіздігіне нұқсан келтіріп жүрген адамдарды ешқандай жауапкершілікке тартпаймыз. Басқа ұлттың үстемдігін жарнамалайтын, тіпті қазақтарға «қазанбас», «нацпати» деп ат қоятындардың ешқайсысын жазалаған жоқпыз. Біздің мемлекеттің аумағында шетелдік арналар бар. Мемлекеттің қаржысын алып отырып, көрші мемлекеттерден «Қазақстанға соғыс ашу керек, тарихы жоқ» деп ақылға қонымсыз ақпараттар таратады. Бұларға шара қолдануға мүмкіндік бар ма? Екіншіден, жалған ақпарат тарататын министрліктер мен әкімшіліктер бар. Осыларды қалай жазалаймыз», – деді Ринат Зайытов.
Министр бұл мәселені саясиландырудың, күрделендірудің қажеті жоқ деп айтты. Ол 33 жылдың ішінде мемлекеттік тілді қолданудың аясы 2 пайыздан 62 пайызға өсті деп отыр.
«Қазір біз оны нақтылап қарадық. Екіншіден, бұқаралық ақпарат құралдарының ішінде мемлекеттік тілде оқитындардың үлесі 80 пайыз. Яғни табиғи түрде өз кеңістігін кеңейтіп келеді. Заң бәрімізге бірдей, ешкімді алалап жатқан жоқпыз. Министрлік барлығына бірдей мониторинг жүргізеді. Заңбұзушылық болған жағдайда құзыретті органдарға беріп отырамыз. Олар өз тараптарынан зерделеп, сараптама жасайды. Бұл жерде ұлтқа байланысты ешкімді бөлмейміз. Қазақстан азаматтарының барлығына заң бірдей. Жалған ақпаратқа қатысты ұстаным да осындай», – дейді Аида Балаева.