Жетісуда жеке тұрғын үй өртеніп, 7 адам зардап шекті. Үй иесі қатты күйіктен көз жұмды.
Талдықорған қаласының іргесіндегі 3-бөлімшеде табиғи газ жарылысынан екі қабатты үйдің тас-талқаны шықты, деп хабарлайды Qaz365.kz.
Жантүршігерлік апат 31 желтоқсан күні болған. ТЖД- нің мәліметінше өрттің аумағы 120 шаршы метрге жеткен.
“2024 жылғы 31 желтоқсанда сағат 07:18–де Талдықорғанда 3-ші бөлімшеде, мешіт маңында орналасқан екі қабатты жеке тұрғын үйде өрт болды. Өрт газ-ауа қоспасының жарылуынан шығып, үйдің екінші қабаты, қабырғаларының бір бөлігі және шатыры құлады. Өрт сөндірушілер келгенге дейін үйден 7 адам, оның ішінде 3 бала эвакуацияланған. Оқиға орнына жедел түрде өрт сөндіру бөлімшелері, Төтенше жағдайлар медицинасы орталығының дәрігерлері және құтқарушылар жетті. Өрт толықтай сағат 07:46–да сөндірілді”, – деп хабарлады Жетісу облыстық төтенше жағдайлар департаментінің баспасөз қызметі.
Бүтін бір отбасы зардап шеккен өрттен үй иесі қайтыс болды.
“Талдықорған қаласындағы ауруханаларға табиғи газдың жарылуынан зардап шеккен 7 адам түсті. Талдықорған қаласындағы облыстық ауруханаға 2 адам, Талдықорған қалалық көпсалалы ауруханаға 3 адам, облыстық балалар ауруханасына 2 адам түсті. Бүгінгі күні 4 адамның жағдайы тұрақталып, травматология бөліміне ауыстырылды. 2 пациент жансақтау бөлімінде ем қабылдап жатыр. Жағдайлары өте ауыр. Алған жарақаттары салдарынан 1973 жылы туған азамат қайтыс болды”, — деді Жетісу облыстық денсаулық сақтау басқармасында.
Талдықорған қаласының баспасөз қызметі де апатқа қатысты арнайы комиссия құрылғандығын хабарлады.
Қазіргі уақытта жарылыстың себебін анықтау мақсатында тексеру шаралары жүргізіліп жатыр.
Бұл жағдай қала әкімідігінің және басқа да құзырлы органдардың тұрақты бақылауына алынды.
