Колледж студенті інісіне жақтаспақ болған
Қызылордада тағы кәмелет жасына толмағандар арасында төбелес шықты, деп хабарлайды Qaz365.kz.
Кеше кешкілік сағат 17:00 шамасында Ақмешіт мөлтек ауданында №136 мектеп-лицейінің 8-сынып оқушысы мен №9 мектеп-гимназиясының 9-сынып оқушысы ерегескен.
Қызылорда қалалық білім бөлімінің айтуынша, №136 мектепте оқитын інісіне жақтасқан “Орда” колледжінің студенті оқушыны соққыға жығып, әлімжеттік көрсеткен.
“Салдарынан №9 мектептің оқушысы жеңіл жарақат алып, ауруханаға жеткізілді. Жасөспірімге аурухана қызметкерлері тарапынан тиісті көмек көрсетілді”, - делінген мәлімдемеде.
Аталған дерек бойынша бүгінде тергеу жүргізілуде, күдікті жасөспірім ата-анасының қарауына тапсырылған.
“10 сәуірде сағат 17:35 шамасында полицияға қала аумағындағы көпқабатты үйлердің бірінің ауласында екі жасөспірім арасындағы төбелес туралы хабарлама түсті. Салдарынан олардың бірі жарақат алып, ауруханаға жеткізілді. Аталған дерек Қазақстан Республикасы Қылмыстық кодексінің 293-бабының (Бұзақылық) бойынша Полиция басқармасының сотқа дейінгі тергеп-тексерудің бірыңғай тізіліміне тіркелді, тергеу әрекеттері жүргізілуде. Сараптамалар тағайындалды”, – деді полиция департаментінен.
Қызылордада жасөспірімдер төбелесі жиілеп кетті. Естеріңізге сала кетсек, оқушылар арасындағы жанжал Қазалы, Жалағаш аудандарынан да шыққан болатын. Тіпті жасөспірімдер баланы тепкілеген видеоны желіде мақтанышпен бөліскен. Оқиғадан кейін бірқатар сала басшылары қызметтен алынды.
