Алайда елімізде мақта өсіріліп, мата дайындалады
Қазақстан мақта өсіріп, маталар дайындайтынына қарамастан, Қытай мен Өзбекстаннан іш киімдер сатып алуда, деп хабарлайды Qaz365.kz тілшісі ZTB-ға сілтеме жасап.
Мұндай тауарларға негізгі қажеттіліктер импорт есебінен өтеледі. ҚР ҚМ Мемлекеттік кірістер комитеті жариялаған кедендік статистикасы халықтың аталған тауарларға қанша ақша жұмсайтынын есептеуге мүмкіндік береді. Яғни 2022 жылдың қаңтар-желтоқсан айларында іш киімнің екі түрі бойынша импорттың құны 77,2 миллион АҚШ долларын құрады. Бұл 2021 жылмен салыстырғанда үш есе көп. Ал негізгі импорттаушы елдер Өзбекстан мен Қытай болып саналады.
«ҚР СЖРА Ұлттық статистика бюросының ресурстар мен пайдалану балансының деректеріне сүйенсек, өткен жылы Қазақстан нарығындағы іш киімнің өндіріс үлесі небәрі 1,2 пайызды, ал импорт үлесі - 98,8 пайызды құрады. 5 жыл бұрын да жағдай дәл осындай болған, түбегейлі ештеңе өзгерген жоқ. Былтыр қазақстандық кәсіпорындарда іш киім өндірісінің көлемі небәрі 1,9 млн дана болды, ішкі нарықта жалпы сатылым көлемі 150,2 млн дана»,- делінген хабарламаның жалпы сипатында.
Дегенмен, Түркістан облысының әкімдігі өңірде бірнеше жылдың ішінде тиісті инфрақұрылымы бар логистикалық хаб құрылатынын айтты. Яғни 2026 жылы Мақтаарал ауданында мақта өңдеу зауыты мен тоқыма мата шығаратын фабрика ашу жоспарланып отырған көрінеді.
