Прокуратура арандатушылық сөздер мен үндеулерге берілмеуге шақырды
Қостанай облысының прокуратурасы соңғы уақытта әлеуметтік желіде Ресей Федерациясы мен Украина арасындағы қақтығысқа қатысты материалдардың көп жариялануына қатысты азаматтарға үндеу жасады, деп хабарлайды Qaz365.kz.
Ведомство жазбалардың кейбірі Қазақстан азаматтарын қақтығысқа қатысуға шақырып қана қоймай, қасақана арандатушылық сөздермен және екі тарап азаматтарының ұлттық ар-намысы мен қадір-қасиетін қорлау белгілері бар жалған ақпаратты қоса тарататынын мәлім етті.
«Әлеуметтік желілердің кейбір пайдаланушылары еліміздің аумағының тұтастығына қатысты сепаратистік үндеулер орналастырып жатыр. Сонымен қатар біздің облыс аумағында Украинадағы қарулы қақтығысқа қатысу үшін Ресей Федерациясының аумағына жергілікті тұрғындарды іріктеу әрекеттері тіркелді. Бұл әрекеттерге Қазақстан Конституциясымен, біздің ел қатысушы болып табылатын жалпыға бірдей танылған халықаралық-құқықтық құжаттармен тыйым салынған», – делінген прокуратура хабарламасында.
Аталған орган азаматтарды қоғамдық қауіпсіздікті қамтамасыз ету, азаматтардың құқықтары мен бостандықтарын қорғау, қоғамдық-саяси жағдайды тұрақсыздандыруға жол бермеу мақсатында бұқаралық ақпарат құралдарында және әлеуметтік желілерде осындай арандатушылық сөздер мен үндеулерге берілмеуге шақырды.
«Қазақстан азаматының шет мемлекет аумағындағы әскери іс-қимылдарға қасақана заңсыз қатысуы, сол сияқты ұлттық араздықты қоздыруға бағытталған қасақана іс-әрекеттер, бұқаралық ақпарат құралдарын немесе телекоммуникация желілерін пайдалана отырып, Қазақстанның тұтастығын, оның аумағына қол сұғылмаушылық пен бөлінбеушілікті бұзуға жария түрде шақыру қылмыстық-жазаланатын іс-әрекеттер (ҚР ҚК-нің 172, 174, 180-баптары) болып табылатынын және 10 жылға дейін бас бостандығынан айыруға әкеп соғатынын түсіндіреміз», – делінген хабарламада.
Сонымен қатар Қазақстан Республикасы Қылмыстық кодексінің 274-бабына сәйкес, мұндайға жол бергендерге жеті жылға дейін бас бостандығынан айыру көзделген.
