Ұлттық құраманың шабуылшысы өз пікірін айтты
Еуро-2024 іріктеу кезеңінің соңғы ойынында Қазақстан Словениядан жеңілді. Егер осы ойында үш ұпай алғанда Қазақстан тікелей жолдамаға ие болар еді. Бәлкім, алаңға шабуылшы Абат Айымбетовті ертерек шығарғанда гол соғып кетуі мүмкін еді дейтіндер бар. Футболшының өзі тілшілерге берген сұхбатында дайын болғанын айтты, деп хабарлайды Qaz365.kz.
«Ұтылғаннан кейін әр нәрсе айтыла береді ғой. Белгілі бір себептер бар. Естілер, айтылар. Футбол болғаннан кейін проблемалар болады. Бірақ мен алаңға шығуға дайын едім. Бапкердің өз білгені болған шығар. Сол үшін бұл жерде ешқандай өкініш жоқ. Тек қана қолдаймыз. Өзінің тактикасы болды. Өкінетін ештеңесі жоқ. Алда Ұлттар лигасы келе жатыр. Екінші мүмкіндік деп айтар едім. Барымызды салып ойнаймыз», – деді Абат Айымбетов.
Айта кетейік, Қазақстан Словениядан сырт алаңда 1:2 есебімен ұтылды. Шабуылшы Абат Айымбетов алаңға небәрі 92-минутта Максим Самородовты ауыстырып кірді.
Бұған дейін ҚФФ президентінің кеңесшісі, комментатор Ермұхамед Мәулен подкастардың бірінде негізгі құрамда ойнаған Максим Самородовтың ойынын көруге еуропалық скауттар келгенін айтқан еді. Бәлкім, Самородовтың ойынын скауттар қарау үшін Айымбетовті алаңға кешірек шығарған болар деп топшылайтын сарапшылар бар.
«Дания – Қазақстан кездесуінде Максим Самородовтың ойынын көруге Италияның «Торино» командасынан скауттар келді. Сонымен қатар Түркияның «Фенербахче» клубы да қызығушылық танытып отыр. Ресейден «Краснодар» келісімшарт ұсынды», – дейді Ермұхамед Мәулен.
