Украинадағы соғысты «арнайы әскери операция» деп атады
Ресей президенті Владимир Путин елдің стратегиялық ядролық күштері толық даярлыққа келтірілгенін мәлімдеді, деп хабарлайды Qaz365.kz.
«Стратегиялық ядролық күштер қолдануына кепілдік беріліп, толық даярлық жағдайында тұр. Қаруландыру саласында біз жоспарлағанның бәрі, 2018 жылғы жолдауда айтқаным – бәрі орындалды немесе жұмыс аяқталуға жақын. Гипердыбысты авиациялық «Кинжал» кешені қаруландыруға енді ғана қойылып қана қоймай, арнайы әскери операция барысында дәлдікпен қолданылып та жатыр. Сонымен бірге, шайқаста соққылы гипердыбысты «Церкони» теңіз базасындағы зымыран да өзін көрсетті. 2018 жылы ол туралы айтылмайтын да еді. Бұл жүйе де қатарда», – деді Путин бүгін федералды жиын кезінде.
Украинадағы соғысты «арнайы әскери операция» деп атаған Путин оны аяқтау үшін «бәрін де жасаймыз, біздің азаматтардың егемендігі мен тәуелсіздігін қорғаймыз» деді.
Айта кетейік, осы жылдың 24 ақпанында Ресейдің Украинаға қарсы соғысына екі жыл болды. Екі жақтан он мыңдаған сарбаз қаза болды.
